Arusha yawakumbuka waliouawa na polisi maandamano ya kumpinga meya

Na John Ngunge

Chama Cha Demokrasia na Maendeleo (Chadema) Mkoa wa Arusha, kimefanya maadhimisho ya miaka miwili kukumbuka mauaji yaliyofanywa na polisi kwa wafuasi wa chama hicho huku kikisema kitaendelea kuwa imara kusimamia haki ili taifa lisiharibike.

 

Katika maandamano yaliyofanywa Januari 5, 2011 na wanachama wa Chadema pamoja na wafuasi wao, inadaiwa kuwa polisi walitumia nguvu kubwa ikiwemo silaha za moto kuyazuia hatua ambayo iliwafanya watu zaidi ya 36 kujeruhiwa na kulazwa Hospitali ya Mkoa ya Mount Meru.

 

Purukushani hizo zilisababisha watu watatu Ismail Omary, Denis Shirima na raia mmoja kutoka Kenya aliyekuwa safarini mjini hapa kuuawa baada ya kupigwa risasi na polisi.

 

Maandamano hayo yalikuwa mahususi kupinga kile walichodai kuwa Chama Cha Mapinduzi (CCM), kilifanya hila, njama na ghilba kupindisha sheria na kumwingiza Gaudence Lyimo kuwa meya wa Halmashauri ya Jiji la Arusha.

 

Katika maadhimisho hayo ambayo yalitanguliwa na shughuli ya kutembelea vituo vya watoto yatima na kuwapatia chakula na vitu mbalimbali kama sadaka, yalihitimishwa kwa mkutano wa hadhara uliofanyika katika viwanja vya Shule ya Msingi Ngarenaro.

 

Akizungumza katika mkutano huo, Mbunge wa Jimbo la Arusha, Godbless Lema, alisema anashangaa kuona mtu anayejiita meya akiwa bado anatambea na serikali bado inamlinda.

 

“Haiwezekani, kuna watu wamekufa, wamejeruhiwa, wapo watoto yatima, wajane wameachwa kwa sababu ya sakata la umeya, halafu atokee mtu au kikundi cha watu atutake tumalize suala hilo,” alisema. Alisema atashangaa kama meya Lyimo atafanikiwa kuongoza kikao kimoja cha Baraza la Madiwani na yeye akiwamo ndani, basi yeye (Lema) atakuwa mbwa. Alisema madiwani wa Chadema watahudhuria vikao vya madiwani ambapo pamoja na mambo mengine watakuwa wanapinga masuala yatakayokuwa yakizungumzwa humo kama yale ya kuwahamisha wafanyabiashara ndongo ndogo wakiwamo vijana na akina mama.

 

Kwa upande wake, Katibu wa Chadema Mkoa, Amani Golugwa akimkaribisha Lema kuzungumza na wananchi, alisema wataendelea kuwa imara kusimamia haki bila kuchoka ili taifa lisije likaharibika.

 

Alisema msingi wa kazi yao kama chama ni kusimamia haki na kuona kwamba inatawala.